Images Chukua hatua Zozote zinazohitajika ili Umhakikishie Mwenzi wako. Je, uko tayari kufanya hivyo?

Jambo kuu ni kuwa mnyenyekevu na kufuata ushauri. Kwa kufanya hivyo ‘utajifaidi mwenyewe’ na mwenzi wako.  Fikiria hatua mbili unazoweza kuchukua.

Tenga wakati kwa ajili ya mwenzi wako

1. Tanguliza ndoa yako.

Mhakikishe mambo yaliyo ya maana zaidi, jinsi mume na mke wanavyotendeana ni muhimu sana. Mwanamume anayemheshimu mke wake ataheshimiwa na Mungu.   Na mwanamke anayemheshimu mume wake ana thamani kubwa.

Unathamini ndoa yako kadiri gani? Kwa kawaida, unapoona jambo fulani kuwa muhimu, unatumia wakati mwingi kulifanya. 

Jiulize: ‘Katika mwezi mmoja uliopita, umetenga kiasi gani cha wakati ili kuwa na mwenzi wako? Ni mambo gani hususani ambayo umefanya ili kumhakikishia mwenzi wako kwamba ungali marafiki wazuri?’ Ikiwa umetumia wakati mchache au hujatumia wakati wowote kuonyesha kwamba unamjali mwenzi wako, huenda asiamini kwamba unawajibika katika ndoa.

Je, mwenzi wako anafikiri kwamba umewajibika kwa ndoa yako? Utajua namna gani?

JARIBU KUFANYA HIVI: Andika kwenye karatasi mambo haya matano: pesa, kazi, ndoa, burudani, na marafiki. Sasa orodhesha kulingana na kile ambacho unadhani mwenzi wako anatanguliza. Mwambie mwenzi wako afanye hivyo kukuhusu. Mnapomaliza, badilishaneni orodha mlizoandika. Ikiwa mwenzi wako anafikiri kwamba hutumii wakati na jitihada za kutosha kuboresha ndoa yenu, zungumzieni mabadiliko ambayo huenda ukahitaji kufanya ili kuimarisha uwajibikaji wako. 

Pia, jiulize, ‘Ninaweza kufanya nini ili kupendezwa zaidi na mambo yaliyo muhimu kwa mwenzi wako?’

Ukosefu wa uaminifu unaanzia moyoni

2. Epuka kukosa uaminifu katika njia yoyote.

Maneno ya dini yanasema: “Kila mtu ambaye anaendelea kumtazama mwanamke na kumtamani tayari amefanya uzinzi pamoja naye moyoni mwake. Mtu anapofanya ngono nje ya ndoa, yeye analeta pigo kubwa kwa muungano huo, Kwa kweli, kukuza tamaa hiyo mbaya ni kumsaliti mwenzi wako.

JARIBU KUFANYA HIVI: Ukiona kwamba unavutiwa na mtu mwingine ambaye si mwenzi wako, usishirikiane naye isipokuwa iwe ni lazima kufanya hivyo. Usikazie fikira mambo yanayomfanya mtu huyo mwingine awe bora kuliko mwenzi wako. Badala yake, fikiria sifa nzuri za mwenzi wako. Kumbuka ni kwa nini ulimpenda mwenzi wako. Jiulize, ‘Je, kweli mwenzi wako amepoteza sifa hizo, au umeacha kuziona?’

Iwe ndoa yako ni imara au ina matatizo, mwenzi wako anahitaji kujua kwamba unajitahidi kufanikisha ndoa yenu. Chukua hatua zozote zinazohitajika ili umhakikishie mwenzi wako jambo hilo. Je, uko tayari kufanya hivyo?