Images Unataka Kuishi kwa Furahaa!!

Katika maisha kuna mambo mengi sana ambayo unayatamani, na kila siku unaomba yawe mikononi mwako. Tangu ulipoanza kuyatamani ulikuwa na mipango, mawazo na mikakati mingi sana kichwani, lakini mpaka leo haujafanikiwa kuwa nacho. Na yawezekana unajiuliza kila siku na jibu mpaka leo haujapata. Sasa hebu leo chukua hizi hatua nane halafu anza kuzifanyia kazi:

1.ANZA KUKAA NA WATU SAHIHI

Hawa ni watu ambao wewe unapokuwa nao unafurahia, wanaokupenda, kukuthamini, na wanaokutia moyo wa kutokata tamaa katika mambo yako.Hawa ni wale watu ambao ukikaa nao wanakufanya ujihisi uko hai, ambao wanaokukumbatia wewe wa sasa hivi na wanaotamani kumkumbatia yule unayetamani kuwa, bila masharti yoyote.

2.ANZA KUWA MUAMINIFU KWA NAFSI YAKO

Kuwa muaminifu kwa jambo lipi ni sahihi kwako, na lipi linahitaji kubadilishwa. Kuwa muaminifu kwa lipi unataka kufanikisha na nani unataka kuwa. Ukianza kujidanganya nafsi yako mwenyewe utakuwa unakosa fursa za kujitambua kama unachotamani ni sahihi kwako.

3.ANZA KUTENGENEZA VIPAUMBELE VYA FURAHA YAKO

Mahitaji yako yana umuhimu sana. Kama usipoanza kuweka vipaumbele vya vitu gani hasa vinakupa furaha, hautaweza kujitambua wewe ni nani. Kama utaweza kutambua wewe unafurahia nini itakuwa rahisi kuwafurahisha na watu wako wa karibu.

4.ANZA KUWEKA WAZI WAZO NA NDOTO ZAKO

Katika maisha, kama unasubiri fursa zikufuate utangoja milele, lakini kama ukiziuata fursa huko ziliko zitakupokea kwa mikono miwili. Haina maana kukaa chini na kujisifu kuwa una mawazo na ndoto nzuri, kama haujaanza kuzitoa zionekane.

5.ANZA KUJIVUNIA ULIVYO

Kama haujaanza kujivunia vile ulivyo leo, itakuwa ngumu kupiga hatua zako mwenyewe kuelekea mafanikio. Ukianza kujivunia vile ulivyo utafanya uyaone mawazo yako yana thamani, nguvu na uzuri ambao hakuna mwengine yeyote anao.

6.ANZA KUJIFUNZA KUTOKANA NA MAKOSA

Kama uliwahi kukosea na ukapata funzo fulani anza kulithamini hilo funzo kwa kuchukua mafundisho yake na kuyafanyia kazi. Na ukiweza kufanya hilo, utaona kumbe kukosea ni hatua moja wapo katika kupata mafanikio. Kwani kuna uwezekano mkubwa kabisa kama usipotaka kujifunza kutokana na hilo basi utakuwa unalikwepa daraja ambalo lingekuunganisha na mafanikio.

7.ANZA KUWA MKARIMU KWA NAFSI YAKO

Kama utaendelea kutumia muda mrefu katika kuilaumu nafsi yako, na kutaka kujiadhibu utakuwa unaendelea kujirudisha nyuma. Ukiwa mkarimu kwa nafsi yako utaona nafasi ya wewe kunyanyuka kila unapokuwa umedondoka bila kujikatisha tamaa.

8.ANZA KUSHUGHULIKIA MATATIZO YAKO

Matatizo yanayokukabili hayatoi tafsiri ya wewe ni nani, bali jinsi unavyoyakabili na kuyamaliza ndiyo tafsiri yako ilipo. Matatizo hayawezi kuondoka mpaka wewe mwenyewe uyakabili. Fanya jitihada zako zote pale unapoweza halafu jipongeze kwa hatua uliyopiga.