Images Soma hapa Kama Wenzako Wanakuonea Mpaka Wanakukosesha Raha ya Kuendelea Kuishi.!!!

Kuonewa si jambo dogo. Uchunguzi fulani nchini Uingereza unasema inaonekana kwamba zaidi ya asilimia 40 ya ripoti katika vyombo vya habari vya kitaifa kuhusu vijana wanaojiua zilisema kwamba kuonewa kulichangia sana kuwafanya wajiue.

Kuonewa hutia ndani mengi kuliko kushambuliwa kimwili. Kunaweza pia kutia ndani mambo yafuatayo. 

Kushambuliwa kwa maneno. “Wasichana wanaweza kutumia maneno makali, Siwezi kusahau majina waliyonibandika au mambo waliyosema. Walinifanya nijihisi sifai, sipendwi, na nihisi kuwa bure kabisa. Afadhali wangenipiga badala ya kuniambia maneno hayo.

Kutengwa. “Wanafunzi walianza kuniepuka. Wangenizuia nisiketi nao wakati wa chakula cha mchana kwa kuonyesha kana kwamba meza imejaa. Kwa mwaka mzima, nililia sana na nilikula peke yangu.

Kupitia Intaneti. “Kwa kuandika mambo machache tu kwenye kompyuta, unaweza kumharibia mtu sifa kabisa—au hata kuharibu maisha yake. Huenda ukafikiri ninatia chumvi, lakini hilo linaweza kutokea!” Kumwonea mtu kwa njia hii kunatia ndani kutumia simu ya mkononi kutuma picha au ujumbe mfupi wenye kudhuru.

 Kwa nini watu huwaonea wenzao? Hizi ni baadhi ya sababu za kawaida.

Wao wamewahi kuonewa. “Nilikuwa nimechoshwa kwa sababu wenzangu walinitendea vibaya hivi kwamba nikaanza kuwaonea wengine ili rafiki zangu wanipende. Baadaye nilitafakari na kutambua kwamba lilikuwa kosa kubwa sana!

Wanaiga watu wenye sifa mbaya. “Mara nyingi vijana wanaowaonea wengine . . . wanawaiga wazazi, ndugu na dada zao wakubwa, au watu wengine wa familia,

Wanajifanya eti wana uhakika—lakini wana wasiwasi. “Watoto wanaowaonea wengine huonekana kana kwamba wana ujasiri na uhakika lakini wao hufanya hivyo ili tu kuficha uchungu na hisia za kwamba hawastahili. 

Ni nani wanaoweza kuonewa kwa urahisi?

Wanaojitenga. Vijana fulani ambao hawajui kuchangamana na wenzao hujitenga na wengine na wanaweza kuonewa kwa urahisi.

Vijana wanaoonwa kuwa tofauti na wenzao. Huenda baadhi ya vijana wakaonewa hasa kwa sababu ya sura, rangi, au dini au hata kwa sababu wana udhaifu fulani wa kimwili—jambo lolote ambalo mwoneaji anaweza kutumia kuwadhihaki.

Vijana ambao hawajiamini. Vijana wanaowaonea wengine wanaweza kutambua mtu anayejidharau. Mara nyingi watu wa aina hiyo ndio wanaoonewa kwa urahisi kwa kuwa si rahisi kwao kujitetea.

 Unaweza kufanya nini unapoonewa?

Usionyeshe hisia zozote. “Waoneaji hutaka kujua ikiwa wamefaulu kukuhuzunisha, Usipoonyesha kwamba wamefaulu, wanachoka na kuacha. Mwenye hekima huituliza [roho yake] mpaka mwisho.

Usilipize kisasi. Kulipiza kutazidisha tatizo, hakutalitatua. Usilipize yeyote uovu kwa uovu.

Usijiingize katika matatizo. Kwa kadiri unayoweza, waepuke watu au hali ambazo unaweza kuonewa.

Toa jibu lisilotazamiwa. Jibu, linapokuwa la upole, hugeuza ghadhabu.

Tumia ucheshi. Kwa mfano, mwoneaji anaposema kwamba umenenepa kupita kiasi, lipuuze jambo hilo na useme: “Inaonekana ninapaswa kupunguza kilo kadhaa!

Ondoka. “Kunyamaza kunaonyesha kwamba una nguvu kuliko yule mtu anayekusumbua, Kufanya hivyo kunaonyesha unaweza kujizuia—yule anayekuonea hana uwezo huo.

Jitahidi kujiamini. “Watu wanaowaonea wengine watatambua iwapo hujatulia, watahakikisha kwamba wanakufanya usijiamini hata kidogo.

Mwambie mtu. Kulingana na uchunguzi mmoja, zaidi ya nusu ya watu wote walioonewa kwenye mtandao hawakuripoti kilichowapata, labda kwa sababu ya kuaibika (hasa wavulana) au kwa sababu waliogopa watadhulumiwa wakiripoti. Lakini kumbuka kwamba waoneaji hufaulu zaidi jambo wanalofanya lisipofichuliwa. 

Kufunua kinachoendelea kunaweza kuwa hatua ya kwanza ya kukomesha hali ngumu unayokabili.