MAPENZI ni furaha, lakini siyo wote hubahatika kuwa katika furaha hiyo. Makosa fulani yakifanyika, ama kwa kujua au kwa bahati mbaya huwa mwanzo wa kupoteza furaha katika mapenzi.
Kwa bahati mbaya sana, baada ya kupoteza furaha ni vigumu kuirudisha kwa haraka, hata kama ulikuwa na mwenzi mwingine kwa muda mrefu lakini baada ya kugundua matatizo yake na kuachana naye, utapata shida sana kupata mwingine.
Lakini pia, hata kama utampata ni vigumu sana kumzoea kwa muda mfupi, kuzoea mazingira na kujihakikishia kuwa ndiye mwenzi wako wa kudumu.
Siyo ajabu sana wapenzi kuachana, lakini inapotokea wewe unakuwa wa kuachwa kila siku, lazima ujue kwamba kuna tatizo, tena tatizo lenyewe lazima litakuwa upande wako. Ni jambo gumu kidogo kupata hekima ya kugundua jambo hili, lakini waliobahatika kupata wamekuwa wakifanya maamuzi ambayo hayawaumizi mioyo yao.
Haya mambo yanawezekana rafiki zangu. Kwanza ni kukubali kujifunza, kuangalia wapi ulikosea, ni kipindi gani wenzi unaochana nao wanapatwa zaidi na hisia za kukuacha n.k. Baada ya hapo ni rahisi kusogea mbele zaidi katika kujua jinsi ya kutatua tatizo ulilonalo. Katika mada hii nazungumza zaidi na wanawake.
Wapo wanawake wengi sana ambao wanahangaika kwa sababu ya kuachwa kila siku. Kila mwanaume anayekuwa naye, baada ya muda mfupi tu, anaachana naye! Hajui tatizo, badala yake anaishia kulia tu. Kulia kwako hakutakusaidia lolote kama hutakaa chini na kujiuliza ni wapi kwenye matatizo, ni sehemu gani huwa unakosea!
Kujua chanzo cha tatizo ni mwanzo mzuri sana wa kuelekea kwenye kupata ufumbuzi. Una miaka ishirini na nne tu, lakini umeshakuwa na wanaume tisa! Hili ni tatizo, tena kubwa ambalo linahitaji dawa ya kuponya na siyo ya kutuliza maumivu.
Sikia kilio hiki: “Mpaka sasa nimechoka, nahisi kama sitakiwi kuwa na mpenzi, maana kila ninayekuwa naye lazima ananiacha. Neno nakupenda halina thamani kabisa katika maisha yangu ya sasa, yaani nimechanganyikiwa kabisa sijui nifanyaje niweze kupenda tena?”
Kilio kama hiki kipo kwa wanawake wengi sana nchini, lakini kwa uchache sana ili tuweze kuepukana maummivu pitia vipengele vifuatavyo:
ACHA KUJIRAHISISHA
Kwanza jaribu kujichunguza kama una tabia ya kujirahisisha. Ni kweli umekuwa na tabia ya kujishusha thamani na kuona kama wewe ni wa kuonewa? Kuchezewa? Mwanaume mwenye ndoto na mwanamke wa baadaye wa maisha yake (mke) hahitaji mwanamke wa aina hii.
Anapenda zaidi awe na mwanamke mwenye msimamo anayetambua thamani yake yeye mwenyewe na maisha yake kwa ujumla. Hapendi mwanamke rahisi rahisi! Kama utakuwa wa aina hii, hata kama atakuwa amekupenda, ataishia kukutumia na kukuacha, kwani wewe mwenyewe umejionesha wa namna hiyo.
Mwanaume anapenda sana mwanamke wa kumsumbua kidogo, angalau baadaye apate stori za kusimulia; “Lakini mama nanilii ulinisumbua!”. Huu ni ukweli ambao baadhi ya watu wanaukwepa. Acha kujirahisisha.
Kujirahisisha huku ni pamoja na suala zima la kufanya mapenzi, usiwe na haraka na tendo hilo, usiulizie juu ya kufanya mapenzi, lakini kama ikitokea jamaa akataka, usikubali haraka. Onyesha msimamo wako, ukianisha usivyotaka kuchezewa. Hapo utaonekana mwanamke bora na mwenye msimamo na si wale wasio na staha.
ANZA KUJICHUNGUZA
Wakati mwingine mambo yako yasiyotamanika yanaweza kuwa chanzo cha wewe kuachwa na wenzi wako kila wakati. Angalia tabia zako, tizama mienendo yako, marafiki zako, kauli zako na kila kitu ambacho unadhani kinaweza kuwa tatizo.
Mwanaume hapendi kuwa na mwanamke ambaye ana kampani mbaya, kwani anaamini na wewe pia inawezekana ukawa na tabia chafu kama rafiki zako, lakini kauli nzuri kwa mwenzi pia ni kati ya mambo ambayo mwanaume mwenye nia ya kuoa atavutiwa navyo. Jiangalie upya!
UNYENYEKEVU/KUJALI
Kujiona wewe ni bora kuliko wanawake wote hakukusaidii, sana sana kunazidi kukurudisha kwenye matatizo yale yale kila siku. Mwanamke ambaye hajali na haonyeshi umakini wowote wakati akizungumza na mpenzi wake, hana sifa ya kuwa mke.
Kama ni kweli unataka kuwa mke, lazima uwe makini, uonyeshe kujali kwako na kumuona mwenzi wako kila kitu kwako. Mheshimu, mpe nafasi ya kwanza, hiyo inaweza kuwa safari nzuri sana ya kuelekea kwenye mafanikio.
Jifunze unyenyekevu, ukikosea kuwa wa kwanza kuomba msamaha, kubali kusamehe na hakikisha kwamba unakubali kufundishwa unapokosea. Usiwe mtu usiyejali, ambaye upo tayari kwa lolote, hata kama ni kuachana na mwenzi wako. Hii ni kati ya sumu hatari zitakazokufanya uishie kuachika kila siku.
0 comments: