Images Ni kawaida kwa Binadamu kuwa na Hofu pale anapofanya jambo lolote kwa mara ya kwanza, Pata Habari Kamili Hapa Jinsi ya Kuondoa Hofu Hiyo

Ni kawaida kwa binadamu kuwa na hofu pale anapofanya jambo lolote kwa mara ya kwanza. Yaweza kuwa ni mara yako ya kwanza kwenda shule ( labda darasa la kwanza, kidato cha kwanza au mwaka wa kwanza chuo kikuu).

Lakini vilevile inawezekana ni mara ya kwanza kuanzisha biashara, au ni mara yako ya kwanza kuoa au kuolewa au ni mara yako ya kwanza kusafiri kwa ndege au meli,au labda ni mara yako ya kwanza kuchangia katika mjadala fulani,mara ya kwanza kuajiriwa au kujiajiri au pia inawezekana ni mara yako ya kwanza kufanya mapitio(review) ya makala kama hii na kutoa maoni yako.

vyovyote vile itakavyokuwa(kuna mifano mingi unaweza kuifikiria), ukweli ni kwamba aghalabu kuna shauku au hofu inayoambatana na kufanya jambo lolote kwa mara ya kwanza.Lakini ni ukweli vilevile kwamba hofu au shauku hii inakuwa kubwa zaidi pale ambapo jambo lenyewe linapokuwa geni si kwako tu peke yako, bali kwa jamaa au ndugu au marafiki walio karibu yako,

mathalani kama katika jamaa au ndugu au rafiki zako wa karibu hakuna aliyewahi kupanda ndege,basi inapotokea wewe ukapata nafasi ya kupanda ndege,hakika shauku yako itakuwa kubwa zaidi, maana hujui masikini kitatokea nini utakapokuwa ndani ya ndege.

Hujui kama ukisikia joto ndege ikiwa angani, ufungue dirisha au ufanye nini,hujui kama kutakuwa na wakati wa kuchimba dawa njiani au itakuwaje,bahati mbaya maswali yote haya hakuna yeyote kati ya jamaa zako anayeweza kukupa majibu,mpaka pale wewe mwenyewe utakapo ingia kwenye ndege.

Jambo moja la kuzingatia ni kwamba, huwezi kuahirisha safari eti kwa sababu hujui nini kitatokea njiani,jambo lingine la faraja ni kwamba pamoja na hofu,vilevile kuna furaha na burudani ya aina yake inayotokana na kufanya jambo fulani kwa mara ya kwanza,na niseme tu kwamba hii peke yake ni sababu tosha ya kukufanya wewe ujaribu jambo fulani kwa mara ya kwanza.

Kutokana na nadharia hii,tunaweza kufikia hitimisho kwamba,burudani au furaha hupatikana katika [au baada ya] hofu,au shauku na kwa kweli hata maumivu.

Basi kama kuna jambo hujawahi kufanya; labda hujawahi kupanda mlima kilimanjaro[kama mimi], au hujawahi kuona simba[au kusikia akinguruma] hatua chache kutoka ulipo au hujawahi kuona maajabu mengine yaliyopo huko duniani[na yapo mengi] hakikisha unapata nafasi hiyo.Labda hujawahi kufanya biashara jaribu leo,

labda tangu kuzaliwa hujawahi kutoa hotuba au kuongea mbele za watu tafuta nafasi ufanye hivyo.kama nilivyokwisha kukuasa,mambo haya si kweli kwamba yatakuwa rahisi mara ya kwanza,hakika mara nyingi yataambatana na hofu na maumivu kiasi,lakini hatimaye mambo haya huleta furaha na burudani ya aina yake.
Historia inatufundisha kwamba hata wagunduzi walifanikiwa tu kwasababu waliweza kushinda hofu ya kufanya jambo mara ya kwanza, na kwa kweli walifanikiwa baada ya maumivu makubwa.Thomas Edison mvumbuzi wa taa za umeme[ki biashara] alifanikiwa kutengeneza balbu baada ya kufanya majaribio zaidi ya elfu kumi.

yawezekana mtu akaja na hoja kwamba, vipi kama sitaki kujaribu chochote,ukweli ni kwamba hili haliepukiki,labda unaweza kufanikiwa kwa muda mfupi, lakini ukweli ulio dhahiri ni kwamba mara ya kwanza ulizaliwa [ bila wewe kupenda] basi unayo nafasi ya kujaribu mambo mengi,kwa mara ya kwanza na mara nyingine na nyingine kwa kupenda, 

kabla hujaondolewa[cleared] kwa mara ya kwanza kutoka ulimwengu huu[vilevile bila wewe kupenda].Yaani kabla hujafa,na kwa taarifa tu wengi wanaoishi sasa walishakufa [kwa kupenda] wakiwa na miaka mitano, kumi, thelathini au arobaini;wanasubiri kuzikwa[bila wao kupenda] wakifikia umri wa miaka sitini , sabini au tisini.